تحب الألعاب؟ سهلة إشتغل مطور ألعاب!

نشر في /بواسطة: في:

الكثير منا رافقه شغفه بالألعاب من الطفولة، تحديداً إلى التخرج من ثنوي وإتخاذ القرار المصيري .. أي تخصص أدخل؟ أي مجال؟ اصلاً وش ابي اشتغل؟! ومن أجل الحصول على إجابة لإسئِلتك قد تقوم بإنشاء قائمة بالمواد والهوايات المفضلة لديك، اوه تقول لي تحب الألعاب؟ وكأني أشوف حاصل على ممتاز في الحاسب الآلي! ماشاء الله خلاص عندك ثلاث خيارات ياتصير مبرمج ألعاب، يامصمم ألعاب، يامطور ألعاب *وترا ماتفرق المسميات الناس يعتبروا وظيفتك وحدة وبس*

لتوضيح الفكرة بإذن الله في هالمدونة بحاول أبين أنه شغفك للألعاب ممكن يساعدك تختار مهنتك او يكون له دور ولو صغير في إختيارك للتخصص، وأن إثبات حبك للألعاب لا يقتصر على تطويرها! نعم مطورين ومطورات الألعاب ناس رهيبة بس مو شرط المجال يناسب كل اللاعبين.

الصحة

كم شخص أثار إهتمامه عالم الطب بسبب بعض البرامج التلفزيونة *الغير وثائقية* كـ Grey’s Anatomy، House او ممكن حتى Scrubs!  غالباً في البرامج يتم إستخدام المصطلحات الطبية البحته وأحياناً يتعمقوا في الحالات الصحية ويعطوا المريض شرح مبسط ومفهوم وبكذا يكون في حالة توازن بين الواقعية والتمثيل من ناحية حبكة القصة والشخصيات وما الى ذلك.

لعبة Trauma Center وأجزائها الخمسة *أظن* تملك نفس الأثر بل أكثر! تحصل على المعلومات الطبية الازمة وشخصيات مثيرة للإهتمام وحقيقة تحس بالضغط هائل على كتفك وانت تجري العملية كجراح، ممرضة تصرخ من جهة، وقت محدود، لازم تراقب دقات القلب، ومع يد تحكم Wii ماينفع تستعجل وتجرح المريض بمكان خطأ، ولازم تكون مدرك كل شيء من ناحية المواد اللي تحقن فيها المريض إلى الأدوات المستخدمة.. متى وأين .. وهذا اللي قصدته بأن اللعبة تقدم أكثر من المسلسلات، في المسلسل عادي دورك مشاهد فقط! فاتتك لقطة مو مشكلة، لكن في اللعبة اذا فاتتك توجية معين او معلومة معينة … العملية كلها فاشلة ، لازم تفهم حالة مريضك وتفهم المطلوب.

مو جالسة أقول إن الألعاب الشبيه خلاص بتخليك تدخل طب ولا جراحة ولا تمريض ولا صحة عامة ..الخ … بس أعتقد بيكون لها تأثير إيجابي اذا بتدخل مجال علمي وبتحتاج مادة الأحياء، علوم ، سنة تحضيرية.

التقنية

عدد كبير من الألعاب تستعرض تقنيات متطورة وبعضها قد يكون أشبه بالخيال، لكنها ليست مستحيلة .. وبلا شك مثيرة للإهتمام لذلك يجي دور الهندسة او حتى البرمجة، الإثنين منهم مجالات كبيرة ويندرج منها تخصصات ومسميات عميقة، هندسة ميكانيكة على سبيل المثال جزء منها ممكن متعلق ببناء وتصميم الهيكل بشكل فعال، بالحديث عن التقنية الألعاب مؤخراً بدأت تشهد تطور عظيم وبعضها يقدم تجربة شبه واقعية للاعب  ..

الواقعية

طيب لمه أحصل على A ولا S في كل مهمات اللعبة وافوز في بطولات العالم مابستفيد شيء .. مستحيل تصير مهنتي 😥 ليس صحيح فعلى سبيل المثال Gran Turismo Academy تعتبر أحد الفرص لإنتقال الاعب إلى مستوى المهنية الإحترافية، بإختصار كما الفيديو أعلاه يتم إختيار أفضل لاعبين كل سنة ويتم إخضاعهم لبطولات واختبارات كثيرة، بعدها يتم إختيار الأفضل من الأفضل لإعطائهم تدريب مكثف ليتنهي المطاف بتحويل الاعب إلى سائق سباقات محترف. السؤال هنا هل أنت فعلاً لاعب محترف محترف ولا  لا 😎

فلسفة خيالية!!

شخصياً طالبة في كلية الهندسة وبعد كم ترم ببدأ أتعمق بدراسة Bioengineering، التخصص نوعاً ما خليط بين هندسة وطب وأشياء لا تخطر على عقل بشر، أحد الخيارات للمتخرجين هي الأبحاث، ممل صح؟ كنت اتوقع كذا بس لمه حضرت TedxBoston كان في متحدثة يعمل فريقها على أخذ خلية ~ Cell من مريض وبعدها كل شغلهم يكون على هالخلية، يعملوا إختبارات عليها ايش نوع الدواء المناسب ايش المواد اللي تسبب ردة فعل حساسية خطرة بحيث مستقبلاً يكون لو الشخص لا سمح الله مرض مايكون في حاجة لتضيع الوقت وفي حال كان بحاجة لزراعة ماله داعي الإنتظار لمتبرع واللي ممكن جسمه يرفض هالشيء، لكن الخلايا المأخوذة منه وفيه … آآآه 😐 المهم قبل لا الكل ينام شخصياً حسيت أنه في ترابط او علاقة ولو بشكل بسيط بين اللي نشوفه في الألعاب خاصة اللي تدور قصتها حول فيروسات، أمراض، قدرات غير إعتيادية The last of us ممكن؟ Resident Evil؟ في ترياق أو بإختصار في شيء علم الأحياء يقدر يسويه 😎 او يتلاعب فيه 😈 .

BTVgoqtIUAAbIWp.jpg large

طيب وباقي زيباد؟

أعضاء فريق زيباد  تخصصاتهم متنوعة بشكل غير متصور ( محاسبة، تسويق، أحياء، طب، علوم حاسب، تقنية حاسب، تكنولوجيا المعلومات والإتصالات  ، إدارة طيران، هندسة)، *دليل انه الألعاب تخلي الناس دوافير* ـ 😎 المهم مو الكل إختار تخصصه بناءً على لعبة ولكن قدرنا نطلع ببعض الروابط بين التخصصات والأشياء العجيبة بالألعاب:

وأحياناً ممكن يكون عندك كورس معين مرتبط بالألعاب بشكل كبير

  • تكنولوجيا المعلومات والإتصالات ← المعالج و Motion Capture (شرح مفصل)← في ثلاث أرباع الألعاب الحديثة مثل Beyond: Two Souls (فيديو مترجم) .
  • إدارة طيران ← Airline Operation & Air Safety ← ممكن ألعاب الطيران المحاكية للواقع او ممكن Battlefield *وحدة تعقدت من كثر ماتتحطم فيها الطيارات بدون سبب*.
  • محاسبة، تسويق، إدارة أعمال ← وتأسس مشاريع رهيبة كـ Z-Pad او تشتغل بشركات ألعاب او شركات تقنية عظيمة.
  • هندسة حيوية ← علم النفس psychology ← مثلاً نرغب بإخفاء كنز سنقوم بإضافة بعض التغيرات المناسبة للبيئة المحيطة بحيث تعطي تلميح للاعب..  ايش الأشياء اللي تشد إنتباه الأعب وتحصل على تركيزه وغير كذا ممكن أيضاً له دور في التصنيف العمري للألعاب! بإختصار من نوع اللي الألعاب إيجايبية خلينا نخليها إيجابية أكثر مو من النوع اللي خبري خبرك 🙄 (حقين الألعاب خطر على المجتمع تماماً كالتفحيط) 😐  .. المهم نرجع لمحور حديثنا ← مثال *أهبل*  Psycho Mantis من Metal Gear Solid.

واحيان ثانية ممكن ماتلاقي علاقة مباشرة بلعبة معينة لكن ممكن تواجه تحديات بعملك مثلاً كـ Gas & Oil Operator، وكذا تحس لمه تخلص *شفت* الدوام يطلع لك تروفي 😎

( تهانينا لقد إنتهي اليوم بنجاح!)  

وبس الباقي عليكم 😎 شاركونا فلسفتكم العجيبة بين تخصصك الحالي او المستقبلي وكيف تحسوا انه مرتبط بالألعاب بشكل أو بآخر؟ وهل تؤمن بالقاعدة ان محبين الألعاب لازم يشتغلوا مطورين ألعاب؟!

  (تهانينا لقد إنتهيت من قراءة المقال للحصول على كأس البلانتيوم يتوجب عليك كتابة تعليق رهيب) 😆

تعليق 17

  • عبدالله القويز

    عبدالله القويز

    مقالك جميل جدا
    بس انا شخصيا ما اشوف ان الالعاب ساعدتني في اختيار تخصصي لان معضم الناس خاصتا عندنا في السعوديه تختار تخصصها بنائا على امكانية التوظيف السهل والسريع, ومع ان اختصاصي وبائيات لكن ما كان لريزدنت ايفل اي علاقه باختياري لهذا التخصص, لكن هذا ما ينكر فايدة الالعاب في حياتك الشخصية وفي تغير طريقة تفكيرك للامور.
    اما عن القاعدة الي تقول ان محبين الألعاب لازم يشتغلوا مطورين ألعاب فهذي مقوله غير صحيحه لان مجال صناعة الالعاب وتطويرها مختلف تماما عن الاستمتاع فيها, لو ان المقوله تقول ان محبين الالعاب لازم يشتغلون في عالم صناعة الالعاب هنا تكون صحيحه, لان مجال صناعة الالعاب له مجالات كثيره مثل التسويق والتخطيط وغيرها.
    اتوقع اني استحق بلاتنيوم 🙂

    (0)
    رد
    • مااخترت تخصصك بناءً على الألعاب بس ممكن خلال دراستك مرت كذا فكرة خاطفة برأسك بإنه فكرة الوبائيات مرتبطة شوي برزدنت ايفيل! هنا يبرز العرق القيمرزي xD
      *ترنق* صوت تروفي البلاتنيوم

      (1)
      رد
  • دخلت تخصص علوم حاسب وبسبب أنه طموحي أطور برامج وأجرب أطور ألعاب ، أسوي برامج ممتاز تساعد على التطوير وتسهيل الأمور.

    مقالة ممتازة وإن شاء الله ناوي اقرأها مره ثانيه.

    (0)
    رد
    • البرمجة شيء أساسي في زمننا الحالي، بالتوفيق رياض وان شاء الله تحقق طموحك وتطور شيء فعال ومفيد 🙂

      (0)
      رد
  • Ahmad

    Ahmad

    best article ever
    من جد ياخي اي شخص يعشق الالعاب يبدأ يفكر بأي تخصص ممكن يربطه بالألعاب وأول فكرة هي انه يكون مطور العاب، لكن مقالك قدر يربط اي تخصص بعالم الألعاب، واللي جعل مقالك افضل مقال بالعالم وسيطلب الغرب ترجمته 😛 هو الأفكار اللي قدرتي توصليها من خلاله مثل اذا انت تحب عالم الألعاب وتبي تصير جزء منه مو لازم تصنع او تطور لعبة، اي تخصص ممكن يخليك جزء من هذا العالم الي عشقته من صغرك، مثل تخصصكِ الرهيب والمثير للاهتمام، وغيرها من الافكار الرهيبة.
    عجبني رد الممثل اللي قام بدور ليون بفلم ريزدنت ايفل الخايس لمه سألته المذيعه عن الألعاب ” جربتها اول ماجيت امريكا، وبصراحة الجلوس طول الوقت وضغط الازرار مايناسبني، افضل الجري والقفز واللعب والعيش في لعبتي الخاصة” الخلاصة انه مو لازم تربط نفسك بتطوير الألعاب لأنها بتشغلك عن المضمون والهدف اللي تحاول توصل له.
    من ناحيتي تخصصي علوم حاسب الي ،شوية برمجة والكثير من الرياضيات والفيزياء. مرتبط مباشرة بعالم الالعاب، هو كان تقريباً التخصص اللي تمنيته بسبب الألعاب، وبنفس الوقت مو نفس التخصص اللي كنت اتمناه ..
    هاه كيف بلاتينوم ولا احاول من جديد واكتب تعليق ثاني ؟

    (0)
    رد
    • عالم الألعاب كبير جداً ومتنوع ومدى هوسك فيه يُمكنك من ربطه بالأنشطة اللي تقوم بها، الأماكن اللي تزورها وحتى الأشياء اللي تدرسها.. وللأسف احياناً ناس كثيرة تنسى هالشيء
      كل التوفيق لك وايه تستاهل بلاتينوم xD

      (0)
      رد
    • التخصصات في مجال صناعة الألعاب متعددة من برمجة لرسم لهندسة لتسويق .. لذلك أول خطوة تحدد بالضبط التخصص وممكن تساعدك قائمة credits في الألعاب وتعرف على الإستديوهات أكثر واعرف متى يوظفوا وايش متتطلباتهم وين مقرهم والخ.

      (1)
      رد
  • أحمد جادالله - سيمافور

    مقال جميل, يعطيك العافية يا سندس,

    طوني العتيبي: ستديو سيمافور مقره الرياض و كامل فريق التطوير و البرمجة موجود فيه و حالياً نبحث عن توسيع فريق العمل بمجالات مختلفة منها البرمجة و التحريك و الرسم من كلا الجنسين.

    لمن يرغب بالانضمام راسلنا على [email protected]

    (1)
    رد
  • طوني العتيبي

    انا تخصصي تقنية معلومات وفي الحقيقة الجزء الوحيد الي حبيته داخل تخصصي هو البرمجة شي جمييل جداً ومعقد (“وذا هو الجزء المخيس بالموضوع”) ومع حبي للبرمجة عندي حب للألعاب بعد , فكرت إني اجمع بينهم لكن في الحقيقة حتى لو حاولت اطور نفسي في ذا المجال مارح احصل وظائف شركات اللألعاب كلها في الخارج ويطلبون خبرة ولو حبيت ادخل استيديو صغير مثل كل مبرمجي اللألعاب المبتدئين بيكون صعب لأنها بعد في الخارج فببساطة تخليت عن حلمي الجميل وبديت افكر ببدائل , لكن دائما الأمل موجود

    بالمناسبة مقال جميل 🙂

    (1)
    رد
    • البرمجة رهيبة كأنك تبني شيء خطوة بخطوة وتتخيل الشكل النهائي بعقلك ولمه تطلع النتيجة النهائية كويسة او افضل من المتوقع تشعر بسعادة عظيمة
      الوظائف بشكل عام أزمة بس في استيدوهات زي يوبيسوفت ابو ظبي واتوقع مع الفترة الآخير ان شاء الله بنشوف استديوهات اكثر واكثر سواء صغيرة او كبيرة، كل التوفيق لك 🙂

      (0)
      رد
  • أنوار سيدام

    أنوار سيدام

    مقالك رهيب سندس !
    وفعلًا ممكن أقدر أقول الألعاب أحد الألعاب اللي خلتني أختار مجال تخصصي في الجامعة .. ومنها براسايت ايف
    كنت ألحظ في الطالبات في محاضرات الجامعة ياخذوا المعلومات فيها بشكل جاف و روتيني
    بس يوم أربط الكلام بلعبة حصلت أو موقف أو فيديو فدا يخليني آخذ المعلومة بشكل شيق وأكون متحمسة بالمحاضرات

    أستحق بلاتينيوم ولا كيف ؟ xD

    (1)
    رد
    • حقيقة وتعتبر أحد إيجابيات الألعاب، الخيال عندك يصير متسع وتقدر تربطها باللي تدرسه ويتحول لشيء ممتع ويساعدك على تذكره بسهولة واللي ممكن يؤدي لمعدل علمي عالي
      ههههه مبروك عليك البلاتينوم

      (0)
      رد
  • TheGamer-F

    كل واحد والشي الي يميل له , ودائما و أبدا أقول الواحد ما راح يبدع في عملة الا اذا كان يعشقة .
    ومن هذا المبدأ انا شخص متيم بالألعاب , فنفسي اكون مطور العاب 😀 ..

    (1)
    رد
    • فعلاً شيء مهم انه الشخص يحب مجاله، اتمنى لك كل التوفيق بس اذا تسمح لي اسأل ليش تطوير ألعاب بالضبط؟ ليش مو هندسة صوت، رسم، تسويق، Digital art تخصصات تأخذ جزء ليس بصغير في تطوير الألعاب

      (0)
      رد
  • m7mmdpro

    تطوير الالعاب ليس بالأمر السهل ( ابداً ) وانا مب احاول احطم ولا شئ من هذا القبيل لكن انت تتكلم وكأن اي شخص يقدر يسوي لعبة
    بيجيك وقت وبتتمنى انك ما اخترت هاذا الخيار وبتقول لو ادري انها صعبة لها الدرجة مادخلتها | لكن اذا كان عندك طموح انك تسوي لعبة بعطيك نصائح
    1 – تطوير الالعاب يشبه اليوتيوب ,الناس مايتابعون اللي دايم ينزل ماين كرافت يعني لازم تنوع وتجيب افكار جديدة.

    2 – ابن اومك تسوي لعبة حرب ,تجي لي تقولي ابي اسوي لعبة زي كود والله ماحد يدعمها ,هاذا غير تكاليف السيرفرات.

    3 – في البداية اقترح عليك انك تتعلم برنامج UNITY 5 وتسوي العاب صغيرة يعني indie games
    كمثال: Slender man, Five Night’s At Freddy’s, i am bread.

    4 – لاتطلب مساعدة من احد لازم تتعلم ,تجي لي تقولي انا عندي قصة قادحة وبتاخذ لعبة السنة بس احتاج فريق ,ماتمشي على الناس.

    5 – في النهاية انصحك انك تدخل فريق ( اذا عرفت المجال وفهمت فيه ).
    وعلى فكرة مبرمج,مطور,مصمم ARE NOT THE SAME وعلى فكرة ثانية المطورين عندهم مثل يقولونه للي يبون يدخلون المجال
    (GAME DEV’S HARD ENOUGH)
    واللي فاهم في المجال هاذا انا عندي فريق اسمه BlackCat طبعاً انا الوحيد اللي فيه المهم انا اطور لعبة رعب (العرب مب فالحين الا بألعاب الرعب) اسمها Badtrip وصلت 10% تتكلم عن البطل خالد اللي طلع مع اخوياه البر يخيمون يومين لكن فجأة كل شئ ينقلب رأساً على عقب حيث البطل يحاول الخروج من الصحراء المليئة بالأموات والأشياء المخيفة (:< .
    المهم اللي حاب انه يعطيني افكار او ينضم للفريق او يشوف صور من اللعبة يدخل التويتر حقي m7mmdpro.
    وبإذن الله بسوي العاب غير العاب الرعب لان العرب مايسوون الا العاب الرعب واللي يفكر ان مافيه مطورين عرب ترا فيه ناس كثييييييير لكن يسوون العاب 2D ولا احد يدعمهم , عندي ملف نص كاتب فيه افكار الالعاب اللي بسويها مستقبلاً اذا تبون تتحفونا بالأفكار ارسلولي على تويتر وانشاء الله احاول اني اشتغل عليها لاحقاً لاني مثل ماقلت لكم اشتغل على لعبة اضن اني طولت عليكم في البداية كنت ناوي اني اكتب كل هاذا الكلام في صفحة لحالها لكن ماجتني رسالة التفعيل على الايميل وشفت الموضوع هاذا وماقدرت امسك نفسي شكراً لقرائتك رأيي ,سلام عليكم.

    (6)
    رد

Send this to a friend